Pictor in fabula

Les Historiographes escrivent pour chose vraye qu’en la ville d’Athenes il y avoit un jeune home yssu de honneste maison, riche competemment & qui estoit fort cogenu, lequel ayant curieusement regardé une statuë de marbre, fort excellement eslaborée, qui estoit en un lieu public d’Athenes, il s’énamoura tellement, qu’il ne pouvoit s’esloigner du lieu où elle estoit assise, ains l’embrassoit moult doucement, & tout le temps qu’il n’estoit aupres d’elle, il se trouvoit mal content, & déploré. Si vint ceste passion à telle extrémité quil recourut au Senat d’Athenes, où faisant offre de grands deniers, il supplia qu’on luy fist grace de la pouvoir emporter chez lui : il ne sembla point au Senat, que de son authorité il peust permettre cela, ny vendre une statuë publique : tellement que celle requeste luy fust refusée : dont il receut en son cœur une merveilleuse tristesse, & s’en alla vers la statuë, qil enrichit d’une couronne d’or, luy donnant vestements, & joyaux de grandes richesse, puis l’adoroit, & contemploit, & avec ceste folie persevera par plusieur jours, jusques à ce que luy estant telles choses deffenduës par le Senat, il se tua soy mesme de courroux.