Tibi gratias ago quam plurimas vir Doctissime et optime de tuo quem mihi promittis Petronio.
Jam in te miratus sum priscorum qui litteras restituerunt et bonas artes senatorum Budæorum et Thuanorum elegantem et peritissimum æmulatorem, scientiæ pené oblitæ restitutorem et ætatis tuæ ornamentum. Nunc iter ad belgas facio, et cras proficiscor cum illustrissima muliere quæ latinæ linguæ perita nunc ad græcas litteras avidum doctrinæ animum applicare inchoat et quæ, geometriæ et physicæ potissimum addicta, eloquentiæ et poeseos lepores non dedignatur quæque acuto judicio, et summa cum voluptate Virgilium, Miltonum, et Tassum perlegit, Ciceronem et Adissonum.

Si alicujus libri opus tibi est qui in his tantum provinciis ad quas pergo reperiundus sit, jubere potes, et mandata tua exequar. Te veneror, et tuus esse velim.

Voltaire

maii pridie nonas [6 May 1739] à Cirey en Champagne