Pour ce qui est de la Tragedie, l’Herode de Monsieur Heinsius l’vn des Poëmes les plus acheuez, plairoit peu à la Cour & à la Ville, par ce qu’il est sans amour ; & la Sophonisbe qui a de la tendresse pour Massinisse iusqu’à la mort, a esté plus goûtée que celle qui sacrifie cette tendresse à la gloire de sa Patrie, quoy que le fameux Autheur du dernier de ces deux ouurages l’ayt traité auec toute la science qui luy est particuliere, & qui luy a si bien apris à faire parler & les Carthaginois, & les Grecs, & les Romains comme ils deuoient parler, & mieux qu’ils ne parloient en effet. […] Enfin la piece leüe & acceptée à la condition du contant ou des deux parts, le plus souuent l’Autheur & les Comediens ne se quittent point sans se regaler ensemble, ce qui conclud le Traité.