Aussi puis-ie dire que quand il s’agit de receuoir dans la Troupe vn Acteur nouueau, ou vne nouuelle Actrice, on n’examine pas seulement si la personne est pourueüe des qualitez necessaires pour le Theâtre, d’vn grand naturel, d’vne excellente memoire, de beaucoup d’esprit & d’intelligence, d’vne humeur commode pour bien viure auec ses camarades, & de zele pour le bien public, qui le detache de tout interest particulier : mais on souhaitte aussi que les bonnes mœurs ácompagnent ces bonnes qualitez, & qu’il ne s’introduise dans la Troupe ny homme ny Femme qui donne scandale, ce qui se void rarement, car tous les bruits qui courent sur ces matieres de tous les endroits du monde sont le plus souuent tres faux. […] S Vr ce qui Nous a esté representé par le Procureur du Roy, Que certains Personnages sans employ, portans l’épée, qui ont en diuerses occasions excité des desordres considerable en cette Ville, ayant depuis peu de jours, auec la derniere temerité, & vn grand scandale, entrepris de forcer les portes de l’Hostel de Bourgogne, se seroient attroupez pour l’execution de ce dessein auec plusieurs Vagabonds, lesquels assemblez en tres-grand nombre, estant armez de Mousquetons, Pistolets & Epées, seroient à force ouuerte entrez dans ledit Hostel de Bourgogne pendant la Representation de la Comedie qu’ils auroient fait cesser, & ils y auroient commis de telles violences contre toutes sortes de personnes, que chacun auroit cherché par diuers moyens de se sauuer de ce lien, où lesdits Personnages se disposoient de mettre le feu, & dans lequel, auec vne brutalité sans exemple, ils maltraittoient indifferemment toutes sortes de gens.