Car outre que le mot de Theatre est presque toûjours confondu avec celuy d’Amphitheatre ; toutes les nouveautez que divers particuliers ont introduit dans leurs Ieux ou dans leurs chasses, leur ont acquis le nom d’Inventeurs & les ont ainsi fait passer pour les premiers Autheurs des choses mesmes qu’ils n’avoient qu’embellies. […] Ie ne fais donc pas difficulté de conclure deux choses : La premiere, que Pline s’est mespris, ou plûtost que les Copistes & les Libraires l’ont fait faillir, quand ils ont lâché ou posé le mot d’Amphiteatre pour celuy de Theatre de Pompée. […] Ie sçay bien que ce mot de Visceration faisoit une partie des ceremonies funebres, où la liberalité estoit sans desordre. Mais enfin, soit qu’on l’ait étendu à celle qui se faisoit dans ces Chasses de joye & de magnificence, soit qu’on l’ait tiré du carnage qui se faisoit, pour distribuer au Peuple la viande qui luy estoit destinée, ce mot est devenu commun à ces deux fortes de solemnitez.