Car bien que quelques-uns ayent voulu en estendre la signification au lieu où cela se faisoit ; C’est une licence qu’ils se sont donnée, & qui n’a pas assez de fondement pour étre ou suivie ou opiniâtrée. Ie ne doute pas que le lieu où il s’est donné de ces sortes de Ieux, n’ait pû en porter le nom ; comme nous avons veu, la place du dernier Carrosel appellée par le vulgaire du nom de la Magnificence qu’il y avoit veüe. Mais le lieu & le nom ont esté bien-tost changez ; & il n’en reste d’apparence ny de vestige, qu’vn souvenir & qu’vne idée. […] Tite son fils aisné en fit la dedicace avec tant de solemnité qu’elle dura prés de cent iours, pendant lesquels il y eut divers combats en divers lieux, tantost d’infanterie, tantost de cavalerie. […] Il y eut toutefois quelque chose de singulier dans l’artifice du lieu, car l’eau fut aussi-tost détournée, & les mesmes troupes y combatirent un moment apres à pied sec.