Cela l’excite à y rentrer auec plus d’ardeur apres vn peu de relasche, cela luy donne vne honneste hardiesse à parêtre en public, & à parler vn iour d’vn ton ferme & d’vn geste libre dans vne Chaire, ou dans vn Barreau. […] Novs, conformément aux ordres de sa Majesté, Avons Fait Tres-Expresses Deffences à toutes sortes de personnes de quelque qualité, condition & profession qu’elles soient, de s’attrouper & de s’assembler au deuant & aux enuirons des lieux où les Comedies sont recitées & representées, d’y porter aucunes armes à feu, de faire effort pour y entrer, d’y tirer l’épée, & de commettre aucune autre violence, ou d’exciter aucun tumulte, soit au dedans ou au dehors, à peine de la vie, & d’estre procedé extraordinairement cõtre eux comme perturbateurs de la seureté & de la tranquilité publique. […] Deffenses sont faites à tous Vagabons & gens sans aveu, mesmes à tous Soldats & autres personnes de quelque qualité & condition qu’elles soient, de s’atrouper & de s’assembler au deuant & és enuirons du lieu où lesdites Comedies & Diuertissemens honnestes seront representez ; d’y porter aucunes Armes à feu, de faire effort pour y entrer, d’y tirer l’espée, & de cõmettre aucune autre violence, ou d’exciter aucun trouble, soit au dedans ou au dehors, à peine de la Vie, & d’estre procedé extraordinairement contr’eux, comme Perturbateurs de la seureté & de la tranquillité publique : Comme aussi deffenses sont faites à tous Pages & Laquais de s’y attrouper, ny faire aucun bruit ny desordre, à peine de punition exemplaire, & de deux cens liures d’amende, au profit de l’Hospital general, dont les Maistres demeureront responsables & ciuilement tenus des desordres qui auront esté faits ou causez par lesdits Pages & Laquais ; & en cas de cõtrauention, il est enjoint aux Commissaires du Quartier de se transporter sur les Lieux, & aux Bourgeois de leur prester main-forte, mesmes de nous informer sur le champ desdits desordres, afin qu’il y soit aussi dés l’instant pourueu ; & que ceux qui s’en trouueront estre les autheurs ou complices, de quelque qualité & condition qu’ils soient, puissent estre saisis & arrestez, & leur procez fait & parfait selon la rigueur des Ordonnances : Deffenses sont pareillement faites à la Troupe des Comediens du Quartier du Marais, de continuer à donner au Public des Comedies, soit dans ledit Quartier, ou autre de cette Ville & Faux-bourgs de Paris ; Et afin qu’il n’en soit pretendu cause d’ignorance, sera la presente Ordonnance affichée aux portes & principales entrées, tant dudit Ien de Paulme audit Faux-bourg S.