Mais vne Republique, où le premier des Magistrats ne fait pas plus de bruit qu’vn simple Bourgeois, ils n’ont personne à voir, & il me souuient qu’en tout Amsterdam, l’vne des plus grandes & plus riches Villes de l’Vniuers, les Comediens François n’auoient qu’vne seule Dame de qualité & d’esprit qui les ápuyoit de son credit ; ils la voyoient quelquefois, & quoy qu’elle fust femme d’vn des plus considerables & plus riches Bourguemestres, sa maison ny son train ne faisoient pas plus de bruit qu’il s’en fait chez vn Marchand. […] Qu’vn des Peres de l’Eglise pour se delasser de se ses serieuses ócupations ne faisoit point de scrupule de passer quelques heures à la lecture de Plaute, ce qu’il témoigne luy méme dans vne lettre qu’il ecrit à vne Dame ; & qu’vn autre tenoit Aristophane soûs le cheuet de son lit, parcequ’auec ceux qui ont quelque sentiment de l’esprit Attique, & qui sçauent ce que c’est que le beau Grec, il reconnoissoit que c’est de ce seul Poëte que ces deux choses se peuuent apprendre.