Pelage voyant qu’il ne pouvoit plus disputer contre la necessité de la Grace, sans estre condamné d’heresie, se servit de plusieurs subtilitez pour faire accroire à toute la terre qu’il n’enseignoit point ce que ses ennemis luy imputoient, qu’il reconnoissoit la necessité des Puissances naturelles, & des lumieres de l’Evangile pour s’abstenir du mal, & pour pratiquer le bien, que la raison & la liberté ne pouvoient estre effacées du nombre des graces, qu’il faudroit n’estre pas moins infidelle & superbe qu’ingrat pour ne pas reconnoistre les instructions, les exemples, & la Passion de Nostre Seigneur pour des graces necessaires, qu’il estoit bien éloigné mesme de nier que les bons mouvemens que ses ennemis mettoient au nombre des graces necessaires, le fussent en effet pour agir avec plus de facilité & avec plus de perfection, que tous les mouvemens qui venoient des lumieres & des exemples de Jesus-Christ, ne pouvoient estre que tres-bons.