Li cerfs lur dist : « E nus nus bendums ! De cele part nus estupums qu’il ne puissent de la entrer ! […] Mut par nus est mesavenu quant li lïen sunt [de]rumpu. Fuium nus en hastivement ! Si nus demurum ici neient, n’i avera ja un sul de nus n’eit suz la cüe treis u dous*. » Cest essample nus dit de ceus ki despisent les menurs de eus : tant les avillent de lur diz quë al grant busuin sunt honiz, e meuz se seivent cil eider la u il unt greinur mester.

« Grant folie », fet il, « fesimes quant l’ostur a rei choisi[si]mes, que nus ocist de jur en jur. Meuz nus fust [il] que senz seignur fuissums tut tens que aver cestui. Einz nus guardïum* [nus] bien de lui, ne dutïum* fors sun aguait ; puis que l’umes a nus atrait, a il tut fet apertement ceo qu’il fist einz celeiement. » Cest essample dit as plusurs, que choisissent les maus seignurs.

Mes ore l’esgarde bien de pres, si tu l’encuntr[o]es jamés, que de lui te saces garder. » — « Nus n’estut pas », fet il, « duter. Il ne nus veut fere nul mal ; de l’autre part del cheval est descenduz, si est mucez : de nus veer est esmaiez. » — « Nenil, beu fiz, de ceo n’i ad nïent ; einz esgarde hardiement, si vait sun fust aparaillant, u ad grant mal el chef devant : s[i]’il le fet vers nus venir, bien en purrum le mal sentir. Meuz est que nus en fuïums. » Dunc li respundi li feüns : « Ne fuirai mie, dici qu’il traie, quel aventure que jeo en aie. » En repruche dit hum suvent que fous ne crent, dici que il pent.

Par les reines que nus veüms, que poür unt, nus purpensums que nus alum querant folie, que nostre grave avum guerpie pur estre aillurs asseürez. […] Ralum nus en !

« Grant laschesce », fet il « fesimes e trop mauveis cunseil creïmes, que grant cumpainie esteiums, quant nus ne nus defendïums vers cest humme, quë a grant tort nus ad tuz pris e jeté mort. » Pur ceo dit hum en repruver : plusurs se leissent damager, cuntrester n’osent lur enemis que ne facent a eus le pis.