Marie de France, n° 87
Les deux loups
Deus lus hors [del] bois s’encuntrerent ;
la se resturent, si parlerent
que nul hum nes osot atendre,
tut ne vousissent il rien prendre.
Ceo dist li uns : « Kar assaiums
bien a fere, si nus poüms,
par quei nus eüssum honur
e que nul n’eit de nus poür. »
Li autre dit : « Jo oi merveilles,
quant tele chose nus cunseilles.
Di dunc u nus poüms aler ! »
— « Jeo te sai », fet il, « bien mustrer.
Veez la cel champ* u la gent sïent,
u lur garbes cuillent e lïent.
Alums [i] e si lur aidums,
e lur garbes ensemble portums ! »
— « Bien avez dit », cil li respunt.
Disci el champ venuz i sunt ;
le blé cuillirent e porterent,
mes les humes les escrïerent.
Li uns des lus ad dunc parlé,
sun cumpainon ad apelé.
« Veez », fet il, « cum nus escrient :
mal nus veulent, [e] pis nus dient.
Nostre bienfet ne vaut nïent
plus que li maus vers ceste gent.
Hastivement al bois alums,
seüms si cum nus sulïums. »
Iluc jurerent e pramistrent
jamés bien ne ferunt, ceo distrent.
Ceo veit hum suvent del felun,
ki a mut petit d’acheisun
laisse le bien qu[e]’il comence ;
s[i]’il ne veit en sa presence
le lüer quë en veut aver,
a mal en turne sun esper.