Avianus 15
[DE GRVE ET PAVONE]
Threiciam uolucrem fertur Iunonius ales
communi sociam continuisse cibo.
Namque inter uarias fuerat discordia formas,
magnaque de facili iurgia lite trahunt,
quod sibi multimodo fulgerent membra decore,
caeruleam facerent liuida terga gruem.
Et simul erectae circumdans tegmina caudae,
sparserat arcanum rursus in astra iubar.
Illa licet nullo pennarum certet honore,
his tamen insultans uocibus usa datur :
Quamuis innumerus plumas uariauerit ordo,
mersus humi semper florida terga geris ;
ast ego deformi sublimis in aere penna
proxima sideribus numinibusque feror.