Avianus 8

[DE CAMELO]

Contentum propriis sapientem uiuere rebus,

nec cupere alterius, nostra fabella monet,

indignata cito ne stet Fortuna recursu

atque eadem minuat quae dedit ante rota.

Corporis immensis fertur pecus isse per auras

et magnum precibus sollicitasse Iouem :

turpe nimis cunctis irridendumque uideri

insignes geminis cornibus ire boues,

et solum nulla munitum parte camelum

obiectum cunctis expositumque feris.

Iuppiter arridens postquam sperata negauit,

insuper et magnae sustulit auris onus.

Viue minor merito, cui sors non sufficit, inquit,

et tua perpetuum, liuide, damna geme.