Avianus 5

[DE ASINO PELLE LEONIS INDVTA]

Metiri se quemque decet propriisque iuuari

laudibus, alterius nec bona ferre sibi,

ne detracta grauem faciant miracula risum,

coeperit in solis cum remanere malis.

Exuuias asinus Gaetuli forte leonis

repperit et spoliis induit ora nouis

aptauitque suis incongrua tegmina membris,

et miserum tanto pressit honore caput.

Ast ubi terribilis animo circumstetit horror

pigraque praesumptus uenit in ossa uigor,

mitibus ille feris communia pabula calcans,

turbabat pauidas per sua rura boues.

Rusticus hunc magna postquam deprendit ab aure,

correptum uinclis uerberibusque domat.

Et simul abstracto denudans corpora tergo,

increpat his miserum uocibus ille pecus :

Forsitan ignotos imitato murmure fallas,

at mihi, qui quondam, semper asellus eris.