Abstemius 195

De mvribvs tintinabvlvm feli svspendere volentibvs

MVres in unum conuenientes consultabant quo ingenio quaue arte felis insidias possent euitare. Tunc qui cæteros et ætate, et rerum usu anteibat, « Reperi inquit uiam, quæ nos a tantis periculis incolumes conseruabit, si mihi parere uolueritis. Suspendamus collo eius tintinabulum, cuius sonitu uenientem aduersus nos felem sentire possimus. » Tunc omnes uoce consona sententiam illius ut saluberrimam laudauerunt, itaque faciendum esse dixerunt. Surgens autem quidam senior imperato silentio. « Ego quoque inquit istam sententiam approbo. Sed quis erit qui collo felis tintinabulum suspendere audeat ? » Quum autem omnes hanc prouinciam subterfugerent irrita sententia fuit. Fabula indicat multos quæ facienda sunt laudare, sed qui ea facere uelint, paucos reperiri.