Abstemius 172

De philosopho cynico qvi percvssori svo argentevm dedit

PHilosophus cynicæ sectæ in iurgio colapho percussus non solum commotus non est, uerum etiam percussorem argenteo numo donauit. Quod quom omnes qui aderant admirarentur, dicerentque eum dignum iterum cædi, « Nescitis nunc inquit, quid egerim. Scietis autem postea. » Haud longo post tempore percussor ille uolens quendam alium cædere (sperabat enim aliquid fortasse lucrari) letale uulnus accepit. Mortem igitur sibi imminere sentiens. « Quanto melius inquit mihi fuisset colapho a cynico repercuti quam numo etiam aureo donari. » Fabula indicat delinquentibus impunitatem peccandi potius quam pœnam interdum nocuisse.