Abstemius 165

De hydro ranam devorare volente

HYdrus in quadam palude Ranam persequebatur, quem quom illa euadere non posset, conuersa dicebat. « Ne me deuora hydre, quæ nulli umquam nocui. » Cui hydrus, « Clamor tuus inquit, minæque, quibus die noctuque obstrepis, te maleficum animal esse testantur. Quod autem non noceas, impotentia causa est. Dentes enim non habes. » Fabula indicat multis non animum nocendi, sed uires deesse.