Abstemius 120

De viro qvi vicino conviciante vesicam concvtiebat

VIr quidam prudens mitis ac tranquilli ingenii habebat uicinum maledicum, iurgiorum amantem, qui eum cottidie conuiciis et maledictis ad iram prouocabat. Vt igitur illius petulantiam et procacitatem retunderet, quoties eum conuiciantem audiebat, nil respondebat, sed uesicam uento plenam, in qua fabas concluserat, concutiebat. Cuius sonitu illum erubescere, et a conuitiis desistere compellebat. Fabula indicat maledictis et stultis uiris minime respondendum, ne eis similes iudicemur.