Abstemius 106

De psittaco admirante cvr maior honor alibi qvam in patria sibi exhiberetvr

PSittacus ex oriente in occidentem delatus ubi huiusmodi aues nasci non consueuerunt, admirabatur se se in maiori pretio, et honore haberi, quam in natali consueuisset solo. Nam caueam eburneam argenteis contextam uirgis incolebat, suauissimisque alebatur cibis, quod cæteris auibus occidentalibus, qui neque forma, neque in exprimendis humanis uocibus erant inferiores, non contingebat. Tunc turtur in eadem cauea conclusus, « Hoc inquit nulla est admiratione dignum. Nulli enim in patria meritus honor exhiberi solet. »