Abstemius 103

De viro deflente vxorem, qvi tamen ostendit statim aliam svperdvcere velle

VIr quidam pauper defunctæ uxoris mortem multis lachrymis et querellis prosequebatur se miserum et infelicem uocitans, qui tam probæ mulieris esset consortio destitutus, utque suum in uxorem testaretur amorem, dicebat in morem turturis compare priuati, in perpetuo cælibatu uelle permanere. Inter lamentandum autem cernens quod mulieres quæ ad curandum funus conuenerant, ueste nimium sumptuosa defunctam induere uolebant. « Quid facitis inquit stultæ ? Quor [sic] tam pretiosam uestem perdere uultis ? Quid alia uxor, quam ducturus sum, feret ? » Tunc omnes, qui aderant, inter luctus et lachrymas uix risum poterant continere. Qui enim paulo ante cælibem uitam agere uelle se dixerat, nunc de alia uxore cœperat cogitare. Fabula indicat difficile esse animi ægritudinem uerborum simulatione cælare [sic].