[M. Grunii Corococtæ porcelli testamentum]h

MARCVS GRVNNIVS Corococta porcellus testamentum fecit. Quoniam manu mea scribere non potui, scribendum dictaui. Magirus cocus dixit « Veni huc euersor domi, soli uertiator, fugitiue porcelle, et hodie tibi dirimo uitam. » Corococta porcellus dixit. « Si qua feci, si qua peccaui, si qua uasella pedibus meis confregi, rogo domine coce uitam peto, et concede roganti. » Magirus cocus dixit. « Transi puer, affer mihi de coquina cultrum, ut hunc porcellum faciam cruentum. » Porcellus comprehenditur a famulis, ductus sub die XVI kalendas lucerninas, ubi abundant cymæ, Clybanato et Piperato consulibus. Et ut uidit se moriturum esse, horæ spatium petiit, et cocum rogauit, ut testamentum facere posset. Clamauit ad se duos parentes ut de cibariis suis aliquid dimitteret eis. Qui ait « Patri meo Verrino Lardino delego dari glandis modios.XXX. et matri me[a]e Scrofæ delego dari lalluginis modios.XL. et sorori meæ Quirinæ, in cuius uotum interesse non potui, delego dari hordei modios.XXX. Et de uisceribus meis dabo sutoribus setas, rixoribus capitinas, surdis auriculas, causidicis et uerbosis linguam, bubulariis intestina, esiciariis femora, mulieribus lumbulos, pueris uesicam, puellis caudam, cynædis musculos, cursoribus et uenatoribus talos, latronibus ungulas. Et nec nominando coco legato dimitto popinam, et pistillum quem mecum atuleram de Tebeste usque ad Terrestre liget sibi collum de reste. Et uolo mihi fieri monumentum ex litteris aureis scriptum, M. Grunnius Corococta porcellus uixit annos DCCCCXCVIIII et VI. Menses quod si semis uixisset, mille annos implesset. Optimi amatores mei uel consules uitæ, rogo uos ut cum corpore meo bene faciatis, bene condiatis de bonis condimentis nuclei piperis et mellis, ut nomen meum in sempiternum nominetur. Mei domini et consobrini mei, qui in meo testamento interfuistis, iubete signari. » Lardio signauit, Ofellicus signauit, Cincinatus signauit, Lucanicus signauit, Tergillus signauit, Celsanus signauit, Nuptialicus signauit.

Explicit testamentvm porcelli svb die XVI. kl lvcernarias Clybanato et Piperato consvlibvs.

Hieronymvs in proœmio XII libri [Commen]tariorvm svorvm in Esaiam

Testamentvm Grvnnii Corococtæ porcelli decantant in scolis pverorvm agmina cachinnantivm.