Avianus 26
[DE CAPELLA ET LEONE]
Viderat excelsa pascentem rupe capellam,
comminus esuriens cum leo ferret iter.
Et prior : Heus, inquit▶, praeruptis ardua saxis
linque, nec hirsutis pascua quaere iugis ;
sed cytisi croceum per prata uirentia florem
et glaucas salices et thyma grata pete.
Illa gemens, desiste, precor, fallaciter, ◀inquit,
securam placidis insimulare dolis.
Vera licet moneas, maiora pericula tollas,
tu tamen his dictis non facis esse fidem.
Nam quamuis rectis constet sententia uerbis,
suspectam hanc rabidus consiliator habet.