Abstemius 89

De rvstico per vocem hædi ad ivrisconsvltvm admisso

RVsticus quidam graui lite implicitus ad quendam iurisconsultum accesserat, ut eo patrono sese explicaret. At ille aliis negociis impeditus renunciari iubet, se non posse nunc illi uacare ; quare abiret alias rediturus. Rusticus, qui huic ut ueteri fidoque amico plurimum fidebat, pluries rediens nunquam admissus est. Tandem hædum adhuc lactantem et pinguem secum deferens ante ædes iurisperiti stabat et hædum uellicans illum balare cogebat. Ianitor, qui ex præcepto heri dona portantes statim admittere solebat, audita hædi uoce, Ianuam illico aperiens hominem introire iubet. Tunc Rusticus ad hædum conuersus « Gratias inquit tibi ago hædule mi, qui tam faciles mihi has effecisti fores. » Fabula indicat nullas tam duras difficilesque fores esse, quas munera non aperiant.