Abstemius 79

De ariete cvm tavro pvgnante

ARies quidam inter lanigeros greges erat, tanta cornuum et capitis firmitate, ut cæteros arietes statim facileque superaret. Quare quum nullum amplius arietem inueniret, qui occursanti sibi auderet obsistere, crebris elatus uictoriis Taurum ausus est ad certamen prouocare. Sed primo congressu quum in taurinam frontem arietasset, tam atroci ictu repercussus est, ut fere moriens hæc diceret. « Stultus ego quid egi ? Cur tam potentem aduersarium ausus sum lacessere, cui me imparem creauit natura ? » Fabula indicat cum potentioribus se non esse decertandum.