Abstemius 78

De cane oves domini svi occidente, a qvo svspensvs est

PAstor quidam Cani oues suas dederat custodiendas, optimis illum pascens cibis. At ille sæpe aliquam ouem occidebat. Quod quum pastor animaduertisset canem capiens eum uolebat occidere. Cui Canis. « Quid me inquit perdere cupis qui sum unus ex domesticis tuis ? Interfice potius Lupum qui continue tuo insidiatur ouili. » « Immo inquit pastor te quam Lupum morte dignum magis puto. Ille enim palam se meum hostem profitetur. Tu uero sub amicitiæ specie cotidie meum imminuis gregem. » Hæc innuit fabula longe magis puniendos, qui sub amicitiæ specie nos lædunt, quam qui aperte se nostros inimicos profitentur.