Abstemius 54

De cera dvritiem appetente

CEra ingemiscebat se mollem et cuicunque leuissimo ictu penetrabilem procreatam. Videns autem lateres ex luto multo se molliori factos in tantam duritiam ignis calore peruenisse, ut multa perdurarent sæcula, se iecit in ignem ut eandem duritiem consequeretur. Sed statim igne liquefacta consumpta est. Hac admonemur fabula, ne appetamus, quod est nobis a natura denegatum.