Premierement, il faut plier vn peu les genoüils & assembler (en glissant) le talon droict au gauche, en se releuant sur la pointe des pieds, & sans s’arrester là dessus, porter le pied gauche à costé, & le droict deuant sur le mouuement d’iceux, puis au quatriesme, en desgageant le pied gauche, le glisser doucement à demy pied de l’autre, & au cinquiesme, assembler comme au premier, pour puis apres couler quatre pas sur le mouuement des pieds, les iambes bien tenduës, & parce qu’au neufiesme le pied droict se trouue deuant, il faut glisser le pied gauche à costé pour assembler encore vne fois le droict, à fin de desgager au douziesme le pied gauche, comme au quatriesme pour recommencer, & ainsi continuer sur ces mesmes pas. […] Les cinq premiers se font ne plus ne moins comme les cinq premiers du precedant, & parce que les pieds se trouuent ioints ensemble, il faut au sixiesme escarter le pied gauche, à fin d’assembler au septiesme encore vne fois, puis au huictiesme rapporter le pied droict de son costé, en retirant tant soit peu en arriere, & glisser au neufiesme le gauche du mesme costé sur la pointe pour assembler, alors en pliant doucement les genoüils au dixiesme, faut releuer le pied gauche en l’air, qu’on escartera de son costé pour marquer onze, apres lequel faisant porter au douziesme le pied droict deuant quasi à la pointe de l’autre, en dégageant au treziesme le gauche, qui sera glissé à costé, faut que le droict le suiue de prés au quatorziesme, & aussi tost qu’il viendra à se ioindre, on doit escarter le gauche, qui est le quinziesme, & continuer ainsi durant qu’on iouëra l’air. […] Au premier desquels, sans quasi bouger d’vne place, on glisse doucement le pied droict pres du gauche, en se releuant sur le mouuement d’iceux, & à l’instant laschant le gauche à costé, & rapportant l’autre en sa place, on tourne vn peu l’espaule droicte en dehors, que le corps tout d’vne piece doit suiure, puis on faict les mesmes trois pas de l’autre costé, commençant du pied gauche, si bien qu’apres auoir tourné l’espaule gauche en dehors, il faut faire vne retirade du pied droict sans leuer le gauche, que sur le mouuement d’iceluy en pliant vn peu les genoüils, & vne toute semblable de l’autre pied. Plus pliant esgalement les genoüils il faut rapporter le pied gauche en l’air, pour d’iceluy marquer vn pas à costé, qui sera à l’instant suiuy d’vn pas coupé du pied droict. A ce dernier couplet il faut faire vn temps en coulant lentement le pied droit par dessus le gauche, & vn autre du gauche en le desgageant & portant à costé, puis deux glissades du costé gauche, & deux autres du costé droit semblables à celles du cinquiesme, si bien que pour finir il ne faut que plier doucement les genoüils pour releuer le pied gauche en l’air, lequel estant porté à costé sera suiuy d’vn pas couppé.