A Monseignevr :
Monseignevr le marqvis de Buckingham Grand Escuier, & Grand Admiral d’Angleterre, &c.

Monseignevr,

Celuy qui offrit nagueres á vostre Grandeur comme vne nouueauté ce que i’auois Il y a quatre ans commencé sur la danse, ne m’a pas causé tant de desplaiseir de se preualoir en cela de mes peines, comme de publier vne piece qui ressentoit encores les imperfections qui accompaignent ordinairement la premiere forme qu’on donne a quelque ouurage, Car quoy qu’il s’en dise l’Autheur plusieurs auquelz la verité (de mon iuste ressentiment) n’est pas incognue, n’en pourroient voir les impertinences sans faire quelque iugement à mon des aduantage. Ce que voulant preuenir il ma semblé necessaire de ne plus differer a mettre en lumiere, non vne piece imparfaite ou nouuellement crayonnée, mais vn tout accompli, & que ie gardois il y a ia long temps en bon equipage de paroistre.

Mais comme les choses (Monseignevr) qui tienent de l’extraordinaire ont besoing de trouuer du support dans vne authorité qui ne soit pas commune : Ce liure estant de ceste Nature (au regard de son inuention) ne pouuoit veoir le iour plus heureusement que soubz l’appuy d’un Seigneur de qui les vertus sont estimées & admiréez de tout le Monde.

Cest pourquoy ie me suis resolu le donnant aux yeux & iugement de tous, de le pouruoir d’une puissante protection, par l’offre que i’en fais a vostre Grandeur, assuré que l’affection quelle a tesmoigné auoir a son subiect par la perfection quelle sen est acquise, ne la pourroit rendre que fauourable a vne ambition qui a pris pour obiect l’vtilité d’un public & laquelle ie desire passionnement (Monseignevr) estre suiuie d’une occasion ou mon affection & ma vie se portent ensemble pour marque que ie m’estime né pour mourir

De Vostre Grandeur