Il y avoit pour lors un fameux Marchand Siennois à Rome nommé sieur Augustin Chigi grand amateur de la vertu et des vertueux, qui avoit desja fait peindre par Raphael une Galathée dans la gallerie de son Palais, nomme Chigi in trastevere, qui est environnée de Trittons. […] Il peignit encore les Ducs Laurent et Jullian de Medicis, beaux à son ordinaire : tant d’excellents ouvrages acquirent beaucoup de reputation et de facultez à Raphael, si bien qu’il resolut de se bastir un Palais dans Rome à Bourgneuf, que l'Architecte Bramante son parent conduisit. […] Ce fut luy qui fit le dessein de la vigne de sa Saincteté, et de plusieurs maisons in borgo : et particulierement celuy du Palais de Me. […] S’il se fust tenu à ce juste millieu il auroit entierement possedé la vertu du sage sçavant ; mais voulant passer plus outre, et monstrer qu’il entendoit aussi bien les nuds que Michel l'Ange, il s’escarta un peu ; comme on le voit à l’incendie de la Chambre de la Tour Borgia, et aux voûtes du Palais d’Augustin Chigi, où ses ouvrages ne se trouverent pas avoir ceste grace, ny ceste douceur. […] Il peignit aussi dans la Chambre de la Tour de Borgia, et au Palais d’Augustin Chigi à plusieurs tableaux à huile et à fresque, il aida Raphaël à peindre la Vierge avec Saincte Elizabeth, qui fut envoiée en France au Roy Francois premier, aussi bien que la Saincte Marguerite laquelle il peignit presque entierement.