Son pere se nommoit Jean de Santi Peintre, et n’eust de sa femme (mere de Raphaël) que luy qu’elle voulut nourrir ; apres l’avoir élevé son pere luy enseigna les principes du dessein, jusques à luy ayder dans son art ; mais quand il eut recognu la portée de son génie, il resolut de le donner à quelque Maistre capable de luy enseigner ce qu’il ne pouvoit luy apprendre : En ce temps-là Pierre Perugin estoit en haute estime ; Jean pere de Raphaël alla à Peruze le visiter, luy parla de son fils, en traitta avec luy, et s’en estans accordés il retourna à Urbin, d’où peu apres il conduisit Raphael à Peruge chez le Perugin. […] Ce n’est pas que ce que Raphael faisoit alors ne fut beavet d’un grand esprit, mais il vouloit voller plus haut, aussi continuant d’estudier Michel l’Ange tout de bon, dans sa maniere pleine de difficulté et de travail de Maistre qu’il estoit, il devint nouveau disciple s’efforcant d’aprendre, estant desja homme en peu de mois, ce qu’il auroit eu besoin dans une jeunesse qui retient tout de plusieurs années. […] Ce terme estant expiré, le Cardinal l’advertit de sa parole, Raphaël s'y accorda bien et accepta la Niepce de ce Cardinal pour sa future espouse, mais il reculoit tousjours le plus qu’il pouvoit de se marier, et veritable ment il avoit de plus hautes portées : il y avoit desja long temps qu’il travailloit pour le Pape et pour toute sa Cour, on luy devoit beaucoup d’argent, il eust admis que sa Saincteté alloit faire une grande promotion de Cardinaux, et qu’achevant la Sale à laquelle il travailloit, il pourroit avoir un Chappeau Rouge pour recompence de tant d’illustres travaux, ajoustant qu’on en avoit proposé de moindre merite que le sien. […] La mort de Raphael fut une grande perte pour la peinture, il l’avoit portée bien haut, et l’auroit sans doute eslevée jusques à son dernier degré s’il eust vescu davantage.