Dans une autre Façade il peignit ce grand sujet de la dispute du saint Sacrement, qui est aussi gravé en deux feüilles, avec plusieurs compartimens d’histoire et figures appropriez au sujet, entre autres Justinian qui donne les loix aux Docteurs pour les corriger, puis au dessus sont la Temperance, la Force et la Prudence ; ce l’autre costé il peignit le Pape ressemblant à Jules second, qui distribue les secrets Canoniques, et Jean Cardinal de Medicis qui depuis a esté Pape sous le nom de Leon Anthoine Cardinal del Monte, et Alexandre Cardinal Farnese, qui depuis a esté Pape Paul IIII. avec quelques autres portraicts. […] Il avoit dans sa jeunesse estudié la maniere de Pierre Perugin, laquelle il fortifia de coloris, de dessein, et d’invention, mais quand il eust atteint plus d’age et de cognoissance, il s’aperceut bien qu’il n’avoit encore rien fait et qu’il estoit bien esloigné du vray, particulierement quand il vit les œuvres de Leonnard da Vinci, qui donnoit la grace et le mouvement aux airs des Testes, et aux Figures, qui n’eust en cette partie là jamais de semblable, il en demeura tout surpris, et d’autant qu’il y prenoit un grand goust: il se mit à l’estudier, s’efforcant d'oublier cette maniere du Perugin son Maistre, ce fut lors qu’il fit des efforts d’esprit extraordinaires pour suivre Leonnard de prés, mais quoy qu’il fit, il ne l'a jamais surpassé, bien que plusieurs ont dit qu’il l’avoit passé en douceur, et une facilité qui luy estoit naturelle, toutefois il ne le surmonta jamais de conceptions terribles ny dans cette force d’art dans lequel Leonnard a eu peu d’egaux ; Raphaël ayant esté l’unique qui en est aproché de plus pres. […] Ses Medecins ignorans la cause de sa maladie pour n’en estre pas advertis, car il leur avoit cellé, le traitterent en malade de fiévre, luy firent tirer force sang, au lieu qu’il avoit besoin de restaurens pour restablir ses forces abatues, si bien que se trouvant bien affoibly il voulut faire son Testament : Mais avant toutes choses comme bon Chrestien, il fit retirer sa donne de son logis, luy despartit de ses biens pour vivre honnestement, puis il se confessa et partagea ses autres biens, instituant Jules Romain, Jean Francesque dit le Fatore ses disciples, et un Prestre d’Urbin, son parent et ses heritiers ; il ordonna sa Sepulture à l’Eglise de N.