Le bruit de cette reputation ne s’en ferma pas tout dans Rome, il vola par dessus les Alpes et se fit entendre en France, en Flandres, en Allemagne, et par tous les lieux où la vertu a des retraites. […] Sixte et Saincte Barbe, beau en toutes ses parties, puis il fit encores d’autres Tableaux pour envoyer en France, entre lequel estoit le Saint Michel qu’il envoya au Roy François premier, duquel il fut bien recompensé. […] Tant de merveilles acumullées les unes sur les autres, par tant de penibles travaux ne luy empescherent pas de peindre encores un beau sainct Jean sur toile, pour le Cardinal Colonne, qui a esté depuis porté à Florence ; lequel on ne sçauroit assez estimer ; et encores apres un autre grand Tableau qu’il peignit au Cardinal Jules de Medicis pour envoyer en France. […] Il peignit aussi dans la Chambre de la Tour de Borgia, et au Palais d’Augustin Chigi à plusieurs tableaux à huile et à fresque, il aida Raphaël à peindre la Vierge avec Saincte Elizabeth, qui fut envoiée en France au Roy Francois premier, aussi bien que la Saincte Marguerite laquelle il peignit presque entierement. Il peignit encores l’habit du portraict de la vice Reyne de Naple que Raphael avoit peinte, aussi envoyé en France, enfin Jules et Francois dit le Fatore, acheverent les quatre Histoires des Gestes de l’Empereur Costantin, que Raphaël avoit commencées dans la grande Sale.