Ces œuvres furent suivis d’un autre : La Chambre de la Tour Borgia où il peignit plusieurs Histoires ; l’une desquelles represente l’incendie de Borgo Vechio, que le Pape Leon IV. eteignit de sa benediction qui est merveilleusement belle, l’autre est du mesme Saint, qui ayant faict construire le port d’Ostie fust attaqué d’une armée navalle de Turcs pensant le surprendre et le faire prisonnier, où il y eust grand combat ; puis encore une autre Histoire où le Pape Leon X. sacre Francois premier Roy de France ; il estoit accompagné de plusieurs Cardinaux, Ambassadeurs et autres personnes et Officiers, necessaires à cette celebre ceremonie, desquels le Pape est suivy quand il tient Chapelle. […] S’il se fust tenu à ce juste millieu il auroit entierement possedé la vertu du sage sçavant ; mais voulant passer plus outre, et monstrer qu’il entendoit aussi bien les nuds que Michel l'Ange, il s’escarta un peu ; comme on le voit à l’incendie de la Chambre de la Tour Borgia, et aux voûtes du Palais d’Augustin Chigi, où ses ouvrages ne se trouverent pas avoir ceste grace, ny ceste douceur. […] Il peignit aussi dans la Chambre de la Tour de Borgia, et au Palais d’Augustin Chigi à plusieurs tableaux à huile et à fresque, il aida Raphaël à peindre la Vierge avec Saincte Elizabeth, qui fut envoiée en France au Roy Francois premier, aussi bien que la Saincte Marguerite laquelle il peignit presque entierement.